Триодь постная. Суббота сыропустная
Въ суббо́ту сы́рную па́мять соверша́емъ всѣ́хъ преподо́бныхъ и богоно́сныхъ оте́цъ, въ по́двизѣ просія́вшихъ.
ВЪ ПЯТОКЪ ВЕЧЕРА,
Во свѣти́льничное, по предначина́тельномъ, обы́чное стихосло́віе: Ко Го́споду внегда́ скорбѣ́ти ми́... На Го́споди воззва́хъ..., пое́мъ стихи́ры подо́бныя, поста́вльше стихо́въ 6, гла́съ 8, повторя́юще я́:
Пріиди́те, вси́ вѣ́рніи, преподо́бныхъ оте́цъ ли́ки воспои́мъ: Анто́нія верхо́внаго, свѣ́тлаго Евѳи́мія, и кого́ждо и вся́ вку́пѣ. И си́хъ, я́коже другíй ра́й сла́дости, гражда́нства мы́сленно преходя́ще, красно́ воззове́мъ: сія́ древеса́, я́же насади́ Бо́гъ на́шъ; сія́ плоды́ нетлѣ́нныя жи́зни процвѣ́тшая, принесо́ша Христу́, пита́юще на́ша ду́ши. Къ ни́мже возопіи́мъ: богоно́сніи, блаже́нніи, моли́те спасти́ся на́мъ.
Подо́бенъ:
Ра́дуйся, Еги́пте вѣ́рный; ра́дуйся, Ливíе преподо́бная; ра́дуйся, Ѳиваи́до избра́нная; ра́дуйся, вся́кое мѣ́сто, и гра́де, и страно́, гра́жданы воспита́вшая Ца́рства небе́снаго, и си́хъ въ воздержа́ніи и болѣ́знехъ возрасти́вшая, и жела́ній соверше́нныя му́жи Бо́гу показа́вшая. Сíи свѣти́ла ду́шъ на́шихъ яви́шася, са́ми чуде́съ заре́ю и дѣ́лъ зна́меньми, просія́ша мы́сленно во вся́ концы́. Къ тѣ́мъ возопіе́мъ: отцы́ всеблаже́нніи, моли́те спасти́ся на́мъ.
Подо́бенъ:
Кто́ изрече́тъ отъ земноро́дныхъ чу́дная ва́ша житія́, отцы́ всемíрніи? Кíй же язы́къ изглаго́летъ свяще́нныя въ Ду́сѣ по́двиги и по́ты ва́ша? Страда́нія добродѣ́телей, изможде́нія пло́ти, боре́нія страсте́й, во бдѣ́ніихъ, въ моли́твахъ и слеза́хъ? Вы́ въ мíрѣ, я́коже а́нгели вои́стинну яви́стеся, са́ми бѣсо́вскія си́лы соверше́нно низложи́сте, сотво́рше чу́дная и ди́вная зна́менія. Тѣ́мже моли́теся съ на́ми, преблаже́нніи, улучи́ти на́мъ неконча́емую ра́дость.
Сла́ва, гла́съ 6:
Еже по о́бразу соблю́дше невреди́мо, ума́ вожда́ на стра́сти па́губныя по́стнически поста́вльше, во е́же по подо́бію, я́ко мо́щно, возшли́ есте́: му́жески бо естество́ пону́дивше, потща́стеся ху́ждшее покори́ти лу́чшему, и пло́ть порабо́тити ду́ху. Тѣ́мже мона́шествующимъ яви́стеся ве́рхъ, жи́тели пусты́нніи, благотеку́щимъ подвиза́тели, пра́вила добродѣ́тели извѣ́стнѣйшая. И ны́нѣ на небесѣ́хъ, зерца́ломъ разрѣши́вшимся, всепреподо́бніи, чи́сто зрите́ Святу́ю Тро́ицу, моля́щеся непосре́дственно о вѣ́рою и любо́вію чту́щихъ ва́съ.
И ны́нѣ, богоро́диченъ 1-й гла́са, осмогла́сника рядова́го.
Свѣ́те ти́хій...
Проки́менъ, гла́съ 7: Бо́же, засту́пникъ мо́й еси́ Ты́,* и ми́лость Твоя́ предвари́тъ мя́. Сти́хъ: Изми́ мя отъ вра́гъ мои́хъ, Бо́же, и отъ востаю́щихъ на мя́ изба́ви мя́.
Проро́чества Заха́ріина чте́ніе. [Гла́ва 8, ст. 19-23.]
Си́це глаго́летъ Госпо́дь Вседержи́тель: по́стъ четве́ртый, и по́стъ пя́тый, и по́стъ седмы́й, и по́стъ деся́тый бу́дутъ до́му Іу́дову въ ра́дость, и въ весе́ліе, и въ пра́здники бла́ги; и возвеселите́ся, и и́стину и ми́ръ возлю́бите. Си́це глаго́летъ Госпо́дь Вседержи́тель: еще́ лю́діе мно́зи пріи́дутъ и живу́щіи во градѣ́хъ мно́гихъ. И сни́дутся живу́щіи въ пяти́ градѣ́хъ во еди́нъ гра́дъ, глаго́люще: гряди́мъ помоли́тися лицу́ Госпо́дню и взыска́ти лице́ Го́спода Вседержи́теля; иду́ и а́зъ. И пріи́дутъ лю́діе мно́зи и язы́цы мно́зи взыска́ти лица́ Го́спода Вседержи́теля во Іерусали́мѣ и умоли́ти лице́ Госпо́дне. Си́це глаго́летъ Госпо́дь Вседержи́тель: во о́ны дни́ име́тся де́сять муже́й отъ всѣ́хъ племе́нъ язы́ческихъ, и и́мутся за ри́зу му́жа іуде́анина, глаго́люще: по́йдемъ съ тобо́ю, зане́ слы́шахомъ, я́ко Бо́гъ съ ва́ми е́сть.
Проки́менъ, гла́съ 6: Да упова́етъ Изра́иль на Го́спода* отъ ны́нѣ и до вѣ́ка. Сти́хъ: Го́споди, не вознесе́ся се́рдце мое́, ниже́ вознесо́стеся о́чи мои́.
Сподо́би, Го́споди, въ ве́черъ се́й...
На стихо́внѣ самогла́сенъ, гла́съ 2:
Очи́стимъ себе́, бра́тіе, отъ вся́кія скве́рны пло́ти и ду́ха, свѣщи́ ду́шъ на́шихъ просвѣти́мъ нищелю́біемъ, не снѣда́юще дру́гъ дру́га оклевета́ніемъ: приспѣ́ бо вре́мя, егда́ Жени́хъ пріи́детъ всѣ́мъ возда́ти по дѣло́мъ и́хъ. Совни́демъ Христу́ съ му́дрыми дѣ́вами, гла́съ о́ный разбо́йника къ Нему́ взыва́юще: помяни́ на́съ, Го́споди, егда́ пріи́деши во Ца́рствіи Твое́мъ.
И глаго́лемъ сти́хъ: Къ Тебѣ́ возведо́хъ о́чи мои́, [Живу́щему на небеси́. Се́, я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́].
И па́ки то́йже самогла́сенъ: [Очи́стимъ себе́, бра́тіе, отъ вся́кія скве́рны пло́ти и ду́ха, свѣщи́ ду́шъ на́шихъ просвѣти́мъ нищелю́біемъ, не снѣда́юще дру́гъ дру́га оклевета́ніемъ: приспѣ́ бо вре́мя, егда́ Жени́хъ пріи́детъ всѣ́мъ возда́ти по дѣло́мъ и́хъ. Совни́демъ Христу́ съ му́дрыми дѣ́вами, гла́съ о́ный разбо́йника къ Нему́ взыва́юще: помяни́ на́съ, Го́споди, егда́ пріи́деши во Ца́рствіи Твое́мъ.]
Та́же сти́хъ: Поми́луй на́съ, Го́споди, поми́луй на́съ, [я́ко помно́гу испо́лнихомся уничиже́нія, наипа́че напо́лнися душа́ на́ша поноше́нiя гобзу́ющихъ и уничиже́нiя го́рдыхъ].
И му́чениченъ: Святы́мъ му́ченикомъ, моля́щимся о на́съ и Христа́ пою́щимъ, вся́кая ле́сть преста́, и человѣ́ческій ро́дъ вѣ́рою спаса́ется.
Сла́ва, гла́съ 8:
Мона́ховъ мно́жества, наста́вники ны́нѣ чти́мъ отцы́ преподо́бніи: ва́ми бо стезе́ю вои́стинну пра́вою ходи́ти позна́хомъ. Блаже́ни есте́, Христу́ рабо́тавшіи, и вра́жію низложи́вшіи си́лу, а́нгеловъ собесѣ́дницы, пра́ведныхъ сожи́теле и святы́хъ, съ ни́миже моли́теся Го́сподеви поми́ловатися душа́мъ на́шимъ.
И ны́нѣ, богоро́диченъ. Подо́бенъ: О, пресла́внаго чудесе́!
Ра́дуйся, чистоты́ сокро́вище; ра́дуйся, невеще́ственнаго Свѣ́та чи́стое жили́ще; ра́дуйся, глави́зно спасе́нія на́шего; ра́дуйся, апо́столовъ проповѣ́даніе; ра́дуйся, му́чениковъ похвало́; ра́дуйся, проро́ковъ исполне́ніе, Всенепоро́чная; ра́дуйся, подви́жниковъ и мона́ховъ украше́ніе, и спасе́ніе вѣ́рныхъ.
Та́же: Ны́нѣ отпуща́еши...
И по Трисвято́мъ глаго́лемъ тропа́рь, гла́съ 4:
Бо́же оте́цъ на́шихъ, творя́й при́сно съ на́ми по Твое́й кро́тости, не отста́ви ми́лость Твою́ отъ на́съ, но моли́твами и́хъ въ ми́рѣ упра́ви живо́тъ на́шъ.
Сла́ва, и ны́нѣ, богоро́диченъ, гла́съ то́йже:
Еже отъ вѣ́ка утае́нное, [и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша].
Ты́яжде и на Бо́гъ Госпо́дь..., и на коне́цъ у́трени глаго́лемъ. Посе́мъ ектенія́: Поми́луй на́съ, Бо́же... и 3 покло́ны вели́кія. Бу́ди и́мя Госпо́дне..., три́жды. Благословлю́ Го́спода... Досто́йно е́сть... и отпу́стъ. И быва́етъ трапе́за по обы́чаю, я́коже и въ сре́ду сы́рную ука́зано е́сть. На повече́ріи же пое́мъ рядовы́й кано́нъ ме́ртвенъ гла́са во усопохрани́тельницѣ.
