Алты яшьлек баланы әнисе кышын урамга куып чыгарган
Кулыма әлеге тикшерү материалы килеп кергәннән соң кылт итеп Габдулла Тукайның “Исемдә калганнар” әсәре исемә килеп төште. Кечкенә Апушның үги әнисеннән куркып кыш көне аяклары бозга катканчы ишек төбендә басып торуы хакында әрнеп укыган идем. Ә бу очракта... газиз ана сабыен чак кына салкында катырып үтермәгән. Район эчке эшләр бүлегенең дознание бүлекчәсе начальнигы Айрат Ахманов биргән мәгълүматларга караганда, райондагы авылларның берсендә яшәүче 40 яшьлек Л. кичен спиртлы эчемлек эчеп нык исерә һәм 6 яшьлек баласын урамга куып чыгара. Өстенә җәйге чалбар, юка кофта кигән малай оекчан килеш 17 градус салкында, ачы җилдә ишек шакып озак басып тора. Ләкин әни кеше аны ишетми, ул рәхәтләнеп йоклый. Ерак тү-гел яшәүче М. урамга кар чистартырга чыккан була, аның янына танышы З. килә дә кайдадыр якында бала елавын ишетү-ен сөйли. М. тиз генә шунда йөгерә, анда капка төбендә елап, салкыннан калтырап торучы баланы күрә. Үз киемнәрен салып аны төрә дә, ананы дәшеп чыгару өчен ишек шакый башлый. Беркем дә җавап бирмәгәч, баланы өенә алып кайта. М. һәм хатыны малайның юешләнеп каткан киемнәрен салдырып, үзен җылы одеялга төрәләр, сөт эчерәләр, авыл фельдшерын чакырталар. Беренче медицина ярдәме күрсәтелгәч, баланы башка авылда яшәүче апасы алып китә. Хәзерге көн-дә малай үзен яхшы хис итә, ул апасы тәрбиясендә яши. Тикшерү барышында ана мондый адымын үзе дә аңлата алмаган. Ул тиздән Россия Федерациясе Җинаять кодексының 125 маддәсе нигезендә суд каршына кабат басачак. Моның өстенә алдагы хөкем ителү срогы да әле чыкмаган. Әлфинур ЙОСЫПОВА.
