Җиңүнең 70 еллыгы уңаеннан амнистия бара
Буа районы буенча җәза үтәтү инспекциясе начальнигы Нияз Закиров әйтүенчә, амнистиягә инспекциядә исәптә торучы 33 кеше эләгә. Бүгенге көнгә 20 шартлы рәвештә хөкем ителүче зат исәптән төшерелгән инде. Бу юнәлештә эш дәвам итә. Россия Федерациясе Федераль Җыенының Дәүләт Думасы тарафыннан 2015 елның 24 апрелендә кабул ителгән 6576-6 номерлы карарының 4 пункты нигезендә җәзадан шартлы рәвештә хөкем ителүчеләр, җәзаның үтәлмәгән өлеше амнистия турында карар үз көченә кергәнче “йомшагракка” алыштырылган яисә җәза үтәү кичектерелгән хөкем ителүчеләр, шулай ук иректән мәхрүм итү белән бәйле булмаган җәзага тартылучылар азат ителә. Ә менә аерым куркыныч рецидивлы җинаять кылучыларга, шулай ук җәза үтәүнең билгеләнгән тәртипләрен бозучыларга таралмый. “Дәүләт тарафыннан бүләкнең” мораль ягы җәзадан азат ителүчене намуска тартудан, цивилизацияле гражданлык җәмгыятенә кайтуга һәм законны тыңлау юлына басып совет халкының батырлыгын аклауга өмет бирүдән гыйбарәт.
