«Барс-Медиа» реклама агентлыгы директорын кичә яшен сугып үтергән
Кичә Татарстанда давыл котырды, яшен яшьнәп, күк күкрәде. Күп районнарда электр уты бетте. Кичке тугызынчы ярты тирәсендә Әтнә районы Ташчишмә авылында да көчле яңгыр башланган. «Барс-Медиа» реклама агентлыгы директоры 28 яшьлек Фәнил Сафиуллин кипкән печәнне капларга дип урамга чыгып йөгергән. Шунда аны яшен суккан һәм ул аңын югалткан. Фәнил Сафиуллин Әтнә районы үзәк хастаханәсенә барышлый юлда аңына килми вафат булды, дип хәбәр иткән Гадәттән тыш хәлләр министрлыгы матбугат үзәге "Татар-Информ" агентлыгы хәбәрчесенә. Фәнил Сафиуллин «Барс-Медиа» реклама агентлыгы директоры вазыйфасын ике ел башкара иде. Ике кечкенә баласы ятим калды. Аны бүген җирлиләр. Туганнарының һәм якыннарының авыр кайгысын уртаклашабыз.
