Тәүбәгә килгән элеккеге наркоман редакция журналисты белән очрашты
Кайчак реаль чынбарлыкны күрсәтү йөз тапкыр “ярамый” дигән сүздән дә ныграк тәэсир итә. Профилактика йөзеннән соңгы ун елда “упкын” төбенә төшеп, аннан өскә күтәрелә алган элеккеге наркоман кыйссасын тәкдим итәбез. Егет шәһәрдә туып-үсә. Мәктәпне тәмамлагач, Казанга югары уку йортына укырга керә. Студент тормышының беренче көннәреннән үзен иректә хис итә башлый: әти-әни еракта, төнге клубта күңел ачарга яратучы дуслар, чибәр кызлар табыла. Бөтенләй икенче дөнья! Менә шунда ул беренче тапкыр “җиңел” наркотик кулланып карый. Ошый, кәефе күтәрелә, мондый “ләззәтне” икенче тапкыр кичерәсе килә, аннан тагын, тагын... Ә берничә атнадан аңардан башка яши алмавын төшенә. Инде бу “кәефләндергеч” элеккеге кебек күңел күтәренкелеге дә бирми, организм көчлерәген сорый башлый. -Беркүпме вакыттан наркотик миңа яшәр өчен кирәк була башлады. Аны сатып алырга көнгә 2-3 мең сум акча кирәк. Беренче дозаны наркотик сатучылар бурычка биреп тора, ә аннары – юк. Берничәсеннән шулай түләүсез алганнан соң мине таный, бирми, куа башладылар, - дип сөйли ул. Герой әйтүенчә, “ломка” наркоманны теләсә кайсы юлга этәрә: буыннар, баш чыдап булмаслык авыртканда, аппетит булмаганда, аң томаланганда бер генә уй бөтерелә: каян табарга? Кайчандыр мәктәпне әйбәт билгеләргә тәмамлап, югары квалификацияле буласы егет “робот”ка әйләнә, башта һаман шул уй: каян табарга? Бу вакытта инде ул институтны ташлый, дистәләгән фатир алмаштырырга өлгерә. Якыннары, дуслары ваз кичә, үзе кебекләрдән башка беркем белән аралашмый, кыргый яшәү рәвешенә күчә. Дозага акча табу өчен якыннарының әйберләрен сата, башкаларныкын да урлый, ахыр чиктә урамга чыгып кеше талый. Ә аннан соң төрмә... Парадокс. Ләкин аңа төрмәгә файдага гына була, ул начар дуслардан арына. Камерада утырганда барлык тормышын яңабаштан уйлый. Булды, туктарга, үз-үземне җиңәргә кирәк, дигән катгый фикергә килә. Иреккә чыккач, наркология диспансерында дәваланып чыга. Кире Буага кайта, эшкә урнаша. -Беренче хезмәт хакы алган көнем истә. Ниһаять, акчаларны наркотик алырга түгел, кирәклегә тотуыма бик сөендем. Биредә яхшы дуслар таптым. Алар алдында авторитетны төшермәү минем өчен мөһим. Якыннарымның ышанычы әкренләп кайтты. Иң шатлыклысы – гаилә кордым, балаларым туды. Мин алар хакына яшим. Үзем югалткан яшь вакытның матурлыгын тойсыннар, укып кеше булсыннар өчен мин бар көчемне бирәчәкмен, - ди ул. - Гомеремне кирегә әйләндереп булса, бу юлга әйләнеп кайтмас идем, башкаларны да тотып селкер идем. Яшьләргә киңәшем шул: бервакытта да ул мәкерне кулланмагыз. Мин дә беренче тапкыр татып карагач та, аннан соң да гел туктыйм дип уйладым. Ләкин очы-кырые булмады. Үз язмышымны җимереп, әти-әни, туганнарны елатып, наркотик хакына яшәдем. Инде мондый бәлагә тарыган булсагыз: иң беренче чиратта наркоман дусларыгыздан арыныгыз, начар компания үзе иң көчле наркотик, дәваланыгыз һәм тормышта ниндидер бер кызыксындыргыч объект табып, шуңа “ябышыгыз”. Минем өчен ул гаилә, дуслар, автомобиль булды, - диде ул әңгәмә ахырында. Әлфинур Йосыпова. Автордан: әлеге материалны әзерләүдә булышкан өчен полициянең җинаятьчеләрне эзләү төркеме начальнигы Альберт Шакировка зур рәхмәтемне белдерәм.
