Татарстаннан сроклы хезмәткә киткән солдат ялгыш башына атып үлгән
Яр Чаллы шәһәреннән армиягә чакыртылган 20 яшьлек егет Бурятиядә хезмәт иткән. Фаҗига буласы көнне – 10 сентябрьдә полигонда хәрби укулар үткәрелгән. Яр Чаллы егете оператор-наводчик булган, укулар вакытында хезмәттәшләре белән БТРда утырган. Сугышчан машинада ату тавышы ишетелгәч барсы да БТРдан сикереп чыгалар. Араларында оператор-нводчик булмаганны белгәч, ул утырган люк капкачын ачалар һәм башына атылган Яр Чаллы егетен күрәләр. Ул үлгән була. Егетнең әти-әниләренә хәрби часть җибәргән телеграммада аның ялгыш аталып үлүе хәбәр ителә. Һәлак булучыга тагын ике ай хезмәт итәргә калган булган. Хәзер әлеге фаҗига буенча Тикшерү эшләре комитеты эш алып бара.
