Татарстан Президенты Рөстәм Миңнеханов "Болгар ислам академиясе булдыру һәм Казан изге Ана иконасы соборын яңадан торгызу турында"гы Указга кул куйды
Шушы көннәрдә Татарстан Президенты Рөстәм Миңнеханов "Болгар ислам академиясе булдыру һәм Казан изге Ана иконасы соборын яңадан торгызу турында"гы Указга кул куйды. Моны тормышка ашыру максатында ТР Министрлар Кабинетына 2015 елның 31 декабренә кадәр чаралар планын эшләү һәм раслау бурычы йөкләнелә. План буенча 2016 елның 21 маена – Идел Болгарстанында рәсми рәвештә ислам динен кабул итү көнендә, Болгар ислам академиясе төзеләчәк урынга беренче нигез ташын салу да оештырылырга тиеш. Ә Казан изге Ана иконасы соборы яңадан булдырылачак урында мондый чара 2016 елның 21 июленә билгеләнгән. Мондый зур төзелешләргә дин әһелләре халык ничек карый? Бу уңайдан буалыларның фикерләрен белештек. Иоанн Ткачук, Троица чиркәве настоятеле: –Мин, дин өһеле буларак, моңа уңай карыйм. Татарстан Президенты Рөстәм Миңнехановның традицион рухи кыйммәтләрне саклап калуга һәм үстерүгә; конфессияара һәм милләтара тынычлыкны, татулыкны тагын да ныгытуга шулай якын килүе шатландыра. Бу хакта күптән түгел Казанда узган Хаҗ йөрешендә дә сөйләштек. Хәзер төзелешләрнең тизрәк чынга ашуын көтәбез. Рәшит Маликов, Буа мәдрәсәсе директоры: - РФ мөселманнары Диния Нәзарәтенең үзәкләштерелгән мөселман дини оешмалары мөселманнары, Россия мөселманнарының Үзәк диния нәзарәте, ТР мөселманнарының Диния нәзарәтенең күптәнге хыялы бу. 1000 ел элек Болгар җирендә бөтен дөньяга танылган фәнни белем бирү мөселман үзәге эшләгән бит инде. Ул халыкара статуска ия булган, анда якын Көнчыгыш илләреннән студентлар белем алган. Болгарны галимнәр һәм белгечләр иле дип атаганнар. Әлеге элеккеге данны академия ярдәмендә кайтару кирәкле һәм тормышка ашарлык гамәл. Президентыбызның Казан изге Ана иконасы соборын яңадан торгызу идеясен дә хуплыйм. Республикада диннәргә карата тигез карашның ачык мисалы бу.
