Буада Россия көнендә депутатлар һәм массакүләм мәгълүмат чаралары вәкилләре футболда ярышты. Кемнәр җиңде? (фоторепортаж)
Җирле үзидарә депутатлары һәм районның газета, телевидение, радио хезмәткәрләре арасында мондый очрашуны “Бердәм Россия” сәяси партиясенең Буа җирле бүлекчәсе һәм яшьләр эшләре, спорт һәм туризм идарәсе оештырды. Ир-ат коллегаларыбыз анда икенче ел рәттән катнашалар. Былтыр отканнар иде, ә бүгенге уенда, киресенчә, оттырырга мәҗбүр булдылар. Депутатлар уенның башыннан ахырына кадәр өстенлекне кулдан ычкындырмады. Пенальтилар бәйгесендә дә алар җиңде. Аларга Диплом тапшырылды, ә “Бердәм Россия” партиясенең җирле бүлекчәсе әзерләгән итсәлекле бүләкләрне һәр уенчы алды. Россия флагы төсендәге тасмаларны тамашачыларга да тараттылар.
