Яшьләр менә шулай яши [+фото]
![Яшьләр менә шулай яши [+фото]](http://www.saby-rt.ru//media/k2/items/cache/1cad7a9d4164fa1e14c958ff4992ab81_S.jpg)
Кайда ничектер, әмма Сабада яшьләр тормышын күңелле, файдалы уздыру өчен мөмкинлекләр күп. Гәрчә, кичен яшьләргә барыр урын юк, дигән фикерләр еш ишетелсә дә.
Мондый фикерләр гадәттә җыеннарда яңгырый. Тормыштан ямь табам дип яшәгән кешегә шөгыльләнү өчен кызыклы урыннар җитәрлек. Спортның да әллә нинди төрләре белән мавыгырга мөмкин. Атта йөрисеңме, бассейнда йөзәсеңме, футбол-волейбол уйныйсыңмы, картингка килеп, картта узышырга да була бик теләсәң.
Саба аграр көллияте укучылары да актив тормыш белән яши. Ел дәвамында уку көнен өч чакрымга йөгерү, 45 минутлык йогадан башлаган егетләр-кызлар тормышка ышаныч белән караучы гражданнар булып тәрбияләнә. Беренче чирканчык алганда ялкауланып кына стартка баскан укучыларның күзләрендә дә максатчанлык чагыла. Көллият укучыларына киләчәктә авыл хуҗалыгының тоткасы булырлык итеп белем бирү өчен зур тырышлык куела.
Укучылар район кырларында практика уза. Машина-трактор мастерскойларында, кырларда дәресләрдә алган белемнәрен ныгыта. Икенче курс студенты, Аккүл Бигәнәй авылы егете Фирдүс Гайнуллинны да машина-трактор паркында “Беларусь”ын төзекләндереп йөргән көннәрдә очраттык.
– Двигателе шакылтады әле, – ди. – Мастерскойда булышалар, рәхмәт. Тотып, эшләп карап өйрәнмичә техниканың серенә төшенеп булмый. Техника үзенә тартты, шуңа күрә тугызынчы сыйныфны тәмамлагач көллияткә укырга килдем. Студент тормышы бик күңелле, ошый.
Тулырак язманы "Саба таңнары" газетасында укый аласыз
