Укытучылар көне белән!
Хөрмәтле укытучылар, мәгариф эше ветераннары, балалар дөньясын гыйлем белән баетучылар!
Сезне алтын көз аенда билгеләп үтелүче һөнәри бәйрәмегез – Укытучылар көне белән котлыйбыз. Мөгаллимлек эше элек-электән иң мактаулы һәм абруйлы хезмәт саналды. Мәктәп бусагасын тәүге тапкыр атлап кергән сабыйга хәреф танырга, укырга өйрәтүдән башлап, тормышта үз юлларын табарга булышуны, чын шәхес итеп тәрбияләүне изге бурычыгыз итеп куясыз. Шуңа да җәмгыять алдында алдынгы карашлы, киң фикерле хезмәт ияләре буларак сезгә ихтирам-хөрмәт зур. Эшегезне олы җаваплылык белән башкарганга зур уңышларга ирешәсез, иң кыйммәте – укучыларыгыз сезне тирән белемнәре, төрле конкурсларда, олимпиадаларда җиңүләр белән шатландыралар. Укытучы алдына куелган бурычлар елдан-ел катлауланса да, нәтиҗәле хезмәт уңышлары белән куандырасыз. Киләчәктә дә сездән яңа биеклекләр, иҗади уңышлар, яңа казанышлар көтәбез.
Хөрмәтле укытучылар, ветераннар! Сезнең барыгызга да ныклы сәламәтлек, укучылар ихтирамы, имин тормыш, якты киләчәк, күңел тынычлыгы телибез.
Саба муниципаль районы Советы һәм башкарма комитеты.