Әкият
[img="http://sabantuy.net/uploads/images/default/rkergt.jpg" border="0" vspace="4" hspace="4" width="179" height="160" align="Right"]rkergt.jpg (16.35 Kb)[/img]
[b]Керпеләр ник энәле?[/b]
Борын заманда керпеләрнең энәләре булмаган. Шуңа күрә дошманнарыннан да саклана алмаганнар, урманда тапкан азыкны да ояларына алып кайту авыр булган.
Бервакыт бер керпе урман җанварларыннан киңәш сорарга киткән. Бара торгач, куянны очраткан.
– Куян дус, син дә минем кебек йомшак тунлы. Дошманнарыңнан ничек сакланасың? – дип сораган.
– Аякларым тиз йөгерә, ә озын колакларым яхшы ишетә минем. Алар аюдан да, төлкедән дә, бүредән дә коткара, – дигән куян.
Ә керпе боларның берсен дә эшли алмаган, шуңа кәефе киткән. Бара торгач, тычканны очраткан.
– Тычкан дус, син дошманнарыңнан ничек сакланасың? – дип сораган.
– Куркыныч килсә, җир астына төшеп китә алам, – дигән тычкан.
Керпе монысын да эшли алмаган. Күңелсезләнеп өенә кайтып барганда, гөлҗимеш куагын күргән. Җимешен алам дип, чәнечкесенә кадалган. Шуннан соң:
– Минем дә шундый энәләрем булса иде! – дип уйлаган.
Шулчак ул бер чыршыны күреп алган да:
– Чыршы, чыршы, син миңа бераз энәләреңне бирә алмыйсыңмы? – дип сораган.
Чыршы:
– Минем чәнечкеле энәләрем бик күп, рәхәтләнеп бирәм, – дигән.
Керпе чыршы биргән энәләрдән күлмәк тегеп кигән. Шул көннән башлап, керпеләр энәле була башлаган. Бу аларны ерткычлардан да саклаган, гөмбә, алма кебек тәмле азыкларны ояларына ташуны да җиңеләйткән.
Алисә ЗАКИРОВА.
Чаллы, 2нче гимназия.