ПэщакIэ фашIыгъ

Iофтхьабзэм нэIуасэ ЛIышъхьэр щыфашIыгъ Къэралыгъо телерадиокомпаниеу «Адыгеим» пэщакIэу фашIыгъэ Ацумыжъ Адам.

Адыгэ Республикэм и ЛIышъхьэу КъумпIыл Муратрэ Урысые Къэралыгъо телерадиокомпанием ишъолъыр департамент ипащэ игуадзэу Андрей Никитинымрэ АР-м и Правительствэ иунэ тыгъуасэ зэIукIэгъу щызэдыряIагъ. Мы Iофтхьабзэм нэIуасэ ЛIышъхьэр щыфашIыгъ Къэралыгъо телерадиокомпаниеу «Адыгеим» пэщакIэу фашIыгъэ Ацумыжъ Адам.

ЗэдэгущыIэгъум хэлэжьагъэх АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженецрэ ащ игуадзэу Къонэ Зауррэ, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр.

ЗэIукIэгъур къызэIуихызэ, Адыгеим и ЛIышъхьэ къыIуагъ республикэм ихэбзэ къулыкъухэмрэ Урысыем и КъТРК-рэ язэдэлэжьэныгъэ шIуагъэ къызэрихьырэр, ащ дакIоу къыхигъэщыгъ Къэралыгъо телерадиокомпанием икъутамэу республикэм щыIэм зэдэлэжьэныгъэ пытэу дыряIэм федэ къызэрихьырэр. КъТРК-у «Адыгеим» Iофэу дашIэрэр тапэкIи шIуагъэ хэлъэу зэрэлъагъэкIотэщтым, республикэм иэлектрон амалхэм зызэраушъомбгъущтым, ащ фэхъурэ зэхъокIыныгъэшIухэм цIыфхэр икъоу нэIуасэ афэшIыгъэнхэмкIэ амалышIухэр къызэритыщтым КъумпIыл Мурат ицыхьэ зэрэтелъыр къыIуагъ.

«IофшIэным епхыгъэ мыщ фэдэ зэфыщытыкIэхэм ыкIи Урысыем и КъТРК зэдэлэжьэныгъэу дытиIэм осэшхо афэтэшIы, тапэкIи республикэм иэлектрон амалхэм заушъомбгъунымкIэ, социальнэ мэхьанэ зиIэ проектхэр тызэгъусэу лъыдгъэкIотэнхэмкIэ, телерадиокъэтыныр лъэгэпIакIэм тетщэнымкIэ амалэу тиIэхэм джыри ахэдгъэхъощт», — къыIуагъ Адыгеим и ЛIышъхьэ.

Андрей Никитиным ипсалъэ къыщыхигъэщыгъ Къэралыгъо телерадиокомпанием икъутамэ иIофхэм ышъхьэкIэ иIахь зэрахишIыхьэрэм, коллективым IэпыIэгъу зэрэфэхъурэм, проектхэу ыкIи Iофтхьабзэхэу кIэщакIо зыфэхъухэрэм зэрадыригъаштэрэм апае КъумпIыл Мурат зэрэфэразэр. Урысые Къэралыгъо телерадиокомпанием ишъолъыр департамент ипащэ игуадзэ къыIуагъ Адыгеим и ЛIышъхьэрэ республикэм ихэбзэ къулыкъухэмрэ зэгъусэхэу зэдагъэцакIэрэр мэхьанэшхо зиIэ ыкIи кIэухышIухэр зыфэхъурэ IофшIэнэу зэрэщытыр.

ЗэIукIэгъум илъэхъан телерадиокомпаниеу «Адыгеим» ипроектхэу непэкIэ щыIэхэм лъэныкъуитIури атегущыIагъэх, кIэу къапыщылъхэмкIи зэзэгъыныгъэ зэдашIыгъ. Ахэм зыкIэ ащыщ чэщи мафи Iоф зышIэщт республикэ телевидениер шъолъырым щызэхэщэгъэным иIофыгъо. КъумпIыл Муратрэ Андрей Никитинымрэ телерадиокомпаниеу «Адыгеим» пэщакIэ фашIыгъэ Ацумыжъ Адам пшъэрылъ заулэ фагъэзагъ. Ахэр зытегъэпсыхьагъэхэр къэбарлъыгъэIэс политикэр пхырыщыгъэныр, республикэм икъэралыгъо бзитIумкIи къэтынхэр нахь игъэкIотыгъэу зэхащэнхэр, Адыгеим щыпсэурэ цIыфхэм апае теле-радиокъэтынэу лъэныкъуабэ къызэлъызыубытырэр зэхащэнэу.

Ацумыжъ Адам Щамсудинэ ыкъор 1988-рэ илъэсым Адыгеим къыщыхъугъ, Адыгэ къэралыгъо университетым итарихъ факультет къыухыгъ. Къэралыгъо телерадиокомпаниеу «Адыгеим» ипащэу агъэнафэфэ нэс президент платформэу «Урысыер – амалхэм яхэгъэгу» зыфиIорэм щылэжьагъ. Ащ нэмыкIэу АР-м икъэралыгъо бюджет учреждениеу «Адыгэ Республикэм итеатральнэ зэхахь» зыфиIорэм маркетингымкIэ иотдел ипэщагъ, республикэ гъэзетэу «Советскэ Адыгеим» иобозревателыгъ, муниципальнэ бюджет учреждениеу «Тэхъутэмыкъое гупчэ клуб системэр» зыфиIорэм иартистыгъ, блогерыгъ. Ацумыжъ Адам Адыгэ Республикэм изаслуженнэ артист, мысатыу автоном организациеу «Урысыер – амалхэм яхэгъэгу» зыфиIорэм ипроект текIоныгъэр къыщыдихыгъ.