Мари мир йис уӆапса ӆаваӆты таха
Ям арат таӆ ёхӆы финно-угорской айкеӆат акатты ёх пиӆн Марий Эл мув Козьмодемьянск воша яңхмеман ма горной мари мир йис уӆапса ӆаваӆты тахайн усам. Щий Горномарийской драматической театран ёнтты ёх вохсайт. Муңева, мойң ёха, щи таха эӆты ой туса. Щаӆта там хорамаң тахайн артистат пиӆн хорат вусув. Козьмодемьянск вош Волга Ас хонаңан омасаӆ. Хунты казанской хатань мир пиӆн ляль эӆты Иван Грозный хон ики Москва воша керӆамаӆан щи тахайн щутьщас. Щи таха ӆувеӆа шеңк мостас, щишн 1583-мет таӆн щита вош омасты эӆты партопса ханшас па Козьма па Дамиан мир лечитты емаң яйңан нэмңанан понты. Кашң аңки няврэмаӆ онтап пуңаӆан омасаӆ. Хор: Людмила Шульгина. Йис тэӆн Козьмодемьянск вошан па ванан уӆты куртатан горной мари мир ус, щишн там мув КПСС райком оӆаңмет секретарь ху В.И. Романов 1977-мет таӆн музей верты эӆты номас верас па нэмасыя партопсайн ёш посӆ понтсаӆӆы. 1983-мет таӆн, ӆуңан, Козьмодемьянск вош 400 таӆ постам порайн мари мир курт иты музей щи тыйс, В.И. Романов нэман понтса. Щита вет гектар мув ӆоватыйн арсыр хотат, хот пуңаӆан уӆты ай хотат, ампарат, хот пормасат, 7 000 моӆтас мари мир ан-сунат, ӆуматты сохат, мув хари рупатайт туты пормасат, вой-хуӆ веӆпас пормасат, нарасъюхат па па отат акатман уӆӆат. Щи мари мир курта ӆоңмеман имохты мельница хот шияӆасам. Ванты, йис тэӆн мари мир нянь торн энмаӆтсат, щишн ӆант верты ураңан щимащ хот омасса. Щи тумпи мари мир картэт ӆуӆтаты вер тайӆат, щишн кашң куртан нэмасыя кузница таха ус. Тата ищи щимащ от уӆ. Щи мир йис пора вуш эӆты юх нуват эӆты арсыр хорамаң пормасат сэвсат, щитат ищи альман усат. Там йисн мари мир щи вер ӆыӆңаптаӆат. Хор: Людмила Шульгина. Уӆты хота ӆоңмеман лён эӆты щашкан верты пормасат, пун верты от, онтап па па ищимащ отат шияӆасам. Там йисн мари мир щи вер ӆыӆңаптаӆат. Горномарийской драмтеатр артистат мари мир эӆты, щишн ӆув рут миреӆ хорамаң ӆуматты сохат ӆуматсат па муң хорамаң хорат вусув. Музей хоща рупитты ёх ястасат, ёхи хащам таӆатан горной мари мир йис рутӆаӆ эӆты оша верты питсат, щишн ван кутан тый ёхатӆат па арсыр верат эӆты иньщасӆат. Ван кутан музейн рупитты хоятат Козьмодемьянск вош пуңаӆан куртат хуват яңхиӆыӆат, горной мари мир йис уӆапса эӆты йис потрат, монщат, арат нох ханшӆат, катра пормасат акатӆат, щитат япсыева нох вантман ӆэрамтӆат па научной нэпекат ханшӆат. Йи тухаӆ порайн тый телевидение ёх ёхтыӆыӆат па мари мир эӆты арсыр кинайт ханшӆат. Тата арсыр научной мирхотат ӆэщатӆайт. Щи томпи музейн рупитты хоятат вошаң мир па няврэмат мари мир рут ясаңа па йис верата утаӆтаӆат. Козьмодемьянск вошаң мир там мари мир курт иты музей самаңа тайӆэӆ, щишн тата рупитты хоятат пиӆн и ёшан там курт яӆпатсат. Людмила Шульгина ханшам потар
