Шоши мир хоятат эӆты нумасман
Хащам ӆапатан Законодатеӆьной Собрание хоща Овс мув шимӆаң мир хоятат па АПК щиран верат туты ху Эдуард Яунгад пресс-конференция верыӆыйс. Мет оӆаңан Эдуард Хабэчевич потартас ЯНАО ӆоватан охаң нэпек постам вер эӆты. Комитет верты рупата щиран аратаӆ вера ох эсаӆман уӆ. Нумасӆа, еӆӆы хатӆатан аршак ох хуӆ эӆты верты ӆэтотата эсаӆты. Ванты, рыбоконсервной заводан верты ӆэтотат мув ӆоватан умащӆыман тайӆайт, мойӆапса юкана тутӆыӆайт. Щи юпийн па потартас, муй хорпи нётопсайт Овс мув шимӆаң мир хоятат ураңан верӆайт. «Вуӆэң ёх емаң хатӆата актащитэӆ порайн, кашң пуш потартыӆат, муй щирн ӆув хощаеӆ верат манӆат. Щишан муң кашң пуш постаӆув па вантӆув, муй хорпи нётопсайт па верты мосӆат. Региональной нётопсайт кашң таӆ мийӆыӆайт: щит курат, электростанцияйт, нюкет па па хорпи пормасат. Красноселькупской па Ӆорвош районан уӆты мохет хот ӆоңӆа лакты картыйн, картӆуңкан, сохаӆан маӆайт хот омасты кеша. Ванты ӆувиӆаӆа унтаң тахайн ӆавартшак нюки хот пиӆан касӆыты», — Эдуард Яунгад ястас. Кашң пуш постаӆа па вантӆа, муй хорпи нётопсайт па верты мосӆат. Хор: «ӅА» архив. Округ ӆоватан хуӆамхощъяң программа хот мощатты щиран рупитаӆ. Нюки муй па парщин хот — жилой помещенияя ант ӆуңтасаӆ. «Чумовой капитал» щиран ох вуйм хоятат, еӆӆы хатӆатан верытӆат хот мощатты щиран матты программая пиӆтащты. Щишан кашң хоят ӆувеӆ рахты программа щиран хот вуты па ӆутты верытаӆ. Леккар хота яңхиӆыты хоятат верат ванан тайӆайт. Ванты, сусан па товийн арпелак мир тохӆаң хопа ӆэӆты ант верытӆат. Нормативной актатан щи верат иса ханшман уӆӆайт. Ар хоят акамты порайн санзаданияйн китты верытӆайт. Еӆӆы хатӆатан нумасӆа маты хуӆ па нёхи тын ихорпия вертыя. Ванты, хуӆ веӆпасӆаты хоятат ищи шеңк ӆаварт рупата верӆат, па ӆув мощатты хуӆэӆ хускем соӆкувайн туп вуӆа. Щи юпийн рахаӆ ястаты, хуӆ веӆпасӆаты ёх уӆапса ямашак йис. «Кашң тащ хотан там йисан тут маты хошапат уӆӆат, щи веран ӆув газет ӆуңаттэӆ тумпийн, телефон па телевизор хуват айкеӆат вантӆат. Арпелак хоятат уйтӆат, муй там хатӆатан Россия ӆоватан тыйиӆыйӆ. Хоты па тахаятан мохет уӆӆат. Щи веран уӆапса йи лотан ант ӆойӆ, па еӆӆы манаӆ», — Эдуард Яунгад потраӆ етшаптасӆы. Аллина Тоярова ханшам потар
