Оляпан ханшам хорат вантапса
Антет емаң хатӆ постаты порайн Ӆорвош район йис пормасат шавиты хотан «Художник. Время. Человек» вантапса пуншса. Эльвира Егоровна Сивкова оляпан ханшам хорӆаӆ хоятата этаӆтаӆайт. Вантапсайн вантты хоратан хоятат па шоши мувев хорамат ханшман уӆӆат. Хорӆаӆ ханшмаӆ порайн Эльвира Егоровна ар хорпи оляпан па ханшты юхатан ханшас. «Ай тэӆан, Овоӆаң куртан энамман, Овкурт ашкуӆайн утаӆтыман, ӆуң сыс Асан хуӆ веӆпасӆаман ащема нётман, ма вантсам, муй хорпи унтаң, кеваң мув сыӆэв хорамат тайӆ, муй рупата куртаң хоятӆам верӆат, хумпаң-йиңкаң Щаня ёханэв муй хорпи уӆӆыйӆ. Хор ханшты вер пеӆа утаӆтымем юпийн вантам хорамӆам нэпека ханшты питсам», — Эльвира Сивкова ястас. Ин ӆув Муши вошан школа искусств хоща рупитаӆ. Самаңа тайты вераӆа няврэмат утаӆтаӆ, муй щиран мосаӆ аӆ хоят сэма ант ныты хорамат нэпека понты. Ӆув утаӆтаты няврэмӆаӆ арсыр касапсаятан ханшам хорӆаӆ ураңан иса мойӆапса нэпекат шитӆат. Там вантапса яӆап таӆ тыӆащ етшаты унты, кашң хатӆ, ихощъяң щёс эӆты ярхус щёс унты рупитты питаӆ. Ӆорвош район йис пормасат шавиты хота хорат вантты ёхтыӆыяты. Зоя Куртямова ханшам потар
