15 еўрапейскіх дыпламатаў зноў прыехалі да Нобелеўскай лаўрэаткі Святланы Алексіевіч, каб падтрымаць яе
У чацвер, 10 верасня, 15 еўрапейскіх дыпламатаў зноў прыехалі да Нобелеўскай лаўрэаткі Святланы Алексіевіч, каб падтрымаць яе.
На старонцы ў ФБ прадстаўніцтва ЕС у Беларусі з’явіўся такі запіс:
«Пасля ўчорашняга спантаннага візіту салідарнасці ў сераду мы вярнуліся ў гасцінны дом нобелеўскай лаўрэаткі Святланы Алексіевіч у амаль поўным складзе.
Мы, амбасадары Еўрапейскага саюза, Аўстрыі, Балгарыі, Чэхіі, Эстоніі, Францыі, Германіі, Італіі, Латвіі, Літвы і Румыніі, а таксама часовыя павераныя ў справах Нідэрландаў, Польшчы, Славацкай Рэспублікі, Швецыі і кіраўнік Мінскага офіса амбасады Фінляндыі, захапляемся мужнасцю і настойлівасцю спадарыні Алексіевіч і ўсіх сябраў Каардынацыйнай рады Беларусі ды іншых грамадзянскіх ініцыятыў у патрабаванні таго, каб у Беларусі панавала вяршэнства права, у абароне годнасці свайго народа, а таксама суверэнітэта і незалежнасці сваёй краіны».
Першы раз еўрапейскія дыпламаты з Літвы, Нямеччыны, Польшчы, Славакіі, Чэхіі і Швецыі прыехалі дадому да Нобелеўскай лаўрэаткі 9 верасня.
Перад гэтым Святлана Алексіевіч распавяла журналістам, што ў яе дзверы званілі невядомыя.
Святлана Алексіевіч засталася адзіным членам прэзідыума Каардынацыйнага савета, хто знаходзіцца на волі ці не пакінуў краіну. Астатнія пад арыштам ці былі вымушаныя пакінуць краіну.
