Пад`ехаў
Думкі ўслых
Было гэта яшчэ падчас маёй маладосці. Вёска наша невялікая, то хадзілі ці ездзілі на роварах за пяць кіламетраў у суседнюю вёску ў клуб на танцы. Гэта цяпер дыскатэкамі завецца.
Ну дык вось. Скончыліся танцы, правёў дзяўчыну ў другую вёску. Гэта яшчэ кіламетраў шэсць, ды вяртаюся дадому. Ногі ўжо гудуць.
Падыходжу да клуба, а там хлопец з нашай вёскі з матацыклам, кажа: «Чакай, вось падладжу ды падвязу».
Што вам сказаць, калі нічога не сказаць? Няма ў хлопца аднаго вока. Чуў, што некага вёз, у здаровае вока трапіла мошка ці іншая кузака, дык вось ён на поўным хаду праціраў гэтае вока, значыць, ехаў усляпую.
Успомнілася, але што рабіць, заўтра, а дакладней, сёння на працу, ногі гудуць, а шыбаваць яшчэ пяць вёрст.
Была не была, паеду, якія ўночы мошкі, падумалася.
Едзем. «Ява» мчыць хутка. Калі ні гляну, а ён вока працірае, то ўжэ ж здаровае, нашто яму пратэз церці.
Не, штаны не змачыў, але маліўся як умеў, пакуль да вёскі не даехалі.
Больш да яго на матацыкл не садзіўся, шукаў розныя прычыны.
Аднойчы нават сказаў, што скула села на тое месца.