Прачнуліся званы Гародні
На паэтычнай хвалі
Край абудзіўшы наш заходні,
Праслаўлены ва ўсе вякі,
Прачнуліся званы Гародні,
Ударылі вечавікі…
Над Прынямоннем стогнуць бомы,
Ірвуць нам душы на шматкі,
Праз плач пытаюць: скуль і хто мы?
За што нам выпаў лёс такі?
На волю рвецца боль народны.
Вякоў няспраўджаны прысуд.
Гудуць, завуць званы Гародні,
Нашчадкі гарадзенскіх труб…
І з уваскрэшаным тым звонам,
Страсаючы пласты ілжы,
Галосіць з гарадзенскім бомам
Народ, распяты на крыжы!
Званы гудуць… А я нямею…
Малюся гмахам камяніц…
І плачу, бо не разумею
Тваіх, Айчына, таямніц…
За што блуканні па пакутах,
Па сутарэннях той маны,
Якою кожны з нас акуты,
Бо закаваны ў кайданы?
Гудуць званы! Я чую крокі…
Сышло цярпенне грамады!
Бо прывялі ілжэпрарокі
Народ да прорвы, да бяды…
І больш няма куды падацца,
Рука да болю цісне крыж…
І так карціць перажагнацца,
Што, мусіць, болей не сцярпіш…
Прачнуліся званы Гародні…