Дзярэчын — Царскае Сяло
Бацьку амаль усіх паэтаў Дзярэчына, а таксама наваколля, вялікаму дзеячу Дзярэчынскай сярэдняй школы, любімаму настаўніку і педагогу, цудоўнаму чалавеку, прафесіяналу-літаратару і мовазнаўцу Пятру Мікалаевічу Марціноўскаму асабіста ад мяне, зусім не апошняга вучня, з вялікай павагай і шанаваннем, прысвячаю.
Дзярэчын — радзільня паэтаў, крыніца, калыска ўсіх Муз.
Здзівіў пестунамі паўсвету наш мілы дзядуля Пятрусь.
Лятаюць, нібыта анёлы, майстры залатога пяра,
Нашчадкі Дзярэчынскай школы, унукі дзядулі Пятра.
Хто Скобла — нат Богу вядома! І біць яму вечна чалом.
Яму не Пеляжын быў домам — Дзярэчын стаў Царскім Сялом!
І каб не было яму горка, бо славу ён п`е ўжо вядром,
Хай помніць, чаму з яго зоркі на край шуганула агнём!..
Зрывае з пляча дубальтоўку і цэліць у самы Парнас
Ваяр Валянцін Дубатоўка, іржэ яго рыжы Пегас…
Па вушы ў творчым палоне, ён сын каваля, а не бомж,
Паплечнік крывіцкай Пагоні, маўклівы змагар Генадзь Коўш.
І толькі адзін не спяшае, пакуль запрагае, пакуль
Пегаса ўпраўна цугляе вясельны музыка Януль…
Дзярэчыну скажам мы дзякуй! Адважным таксама паклон!
І з пёрамі рушым ў атаку, і з імі адыдзем на скон!..