Алег Юрэня-малодшы ўжо не гонар Мастоўшчыны
Так палічылі мастоўскія чыноўнікі і прыбралі білборд з яго выяваю ля стадыёна «Нёман».
Алег Юрэня — самы тытулаваны спартсмен Мастоўшчыны. Вясляр-байдарачнік нарадзіўся ў вёсцы Масты Правыя. З 11 гадоў пачаў займацца веславаннем. Яго трэнер Уладзімір Задолін. Пасля канфлікту з дырэктарам Мастоўскай школы алімпійскага рэзерву Пятром Рудзевічам у 2006 годзе настаўнік і вучань пераехалі ў Брэст, дзе трэніруюцца і да сённяшняга дня.
У Алега багатая калекцыя ўзнагарод з Кубкаў свету, чэмпіянатаў Еўропы і розных універсіяд. У 2012 годзе прадстаўляў Беларусь на Алімпійскіх гульнях у Лондане, выйшаў у фінал, але, на жаль, заняў шостае месца. Нягледзячы на тое, што свае асноўныя дасягненні спартсмен здзейсніў, трэніруючыся ў Брэсце, мастоўскія і гарадзенскія чыноўнікі лічылі яго сваім. Не адзін раз ён прызнаваўся лепшым спартсменам Мастоўшчыны. Сёлета падчас святкавання Дня Незалежнасці ў Мастах яму святочна быў уручаны падарунак.
Алег Юрэня-малодшы патрапіў у няміласць чыноўнікаў з-за прынцыповай пазіцыі бацькі Алега Юрэні. Алег Уладзіміравіч апошні час працаваў інспектарам крымінальнай выканаўчай інспекцыі. Падчас пратэстных акцый пасля прэзідэнцкіх выбараў у Мастах выйшаў на акцыю. За гэта быў пазбаўлены пасады.
За грамадзянскую пазіцыю бацькі ўлады пакаралі сына, якім ганарыліся доўгія гады.
Цяпер на месцы Алега Юрэні-малодшага змешчана выява вясляркі Іны Саўчук.
Алег Уладзіміравіч Юрэня — ураджэнец Слоніма.