Насіце маску — Валяваты прыедзе
17 кастрычніка ў Мастах адбыўся чарговы кірмаш-распродаж сельгаспрадукцыі гараджанам.
У гэты дзень, як звычайна, на ўскрайку горада, куды мастоўскія ўлады ў свой час загналі прадпрымальнікаў, сваю прадукцыю з уласнага падвор`я могуць прадаваць усе, каму заўгодна: вяскоўцы, дачнікі, арандатары, па разнарадцы — сельгаспрадпрыемствы раёна.
Улады абавязалі выставіць палаткі мастоўскай кааперацыі. Кіраўніцтва арганізацыі папярэдзіла сваіх працаўнікоў, што меліся гандляваць на тым мерапрыемстве, працаваць у масках, пальчатках і мець сродкі дэзінфекцыі. Аргумент такой установы быў важкі: старшыня райвыканкама Юры Валяваты будзе на кірмашы.
У гэты дзень на кірмашы маскі мелі толькі некаторыя мастаўляне, што падчас эпідэміі дбаюць пра здароўе. Сам Юры Валяваты на імпрэзах не носіць маскі. Тым часам у будынак Мастоўскага райвыканкама нельга патрапіць звычайнаму чалавеку, бо там санітарны пост, і нават дробнага чыноўніка з-за нікчэмнай паперкі трэба выклікаць па тэлефоне.
