Падзеі, якія адбываліся на Слонімшчыне і ў Беларусі роўна 20 гадоў таму і пра якія пісала “Газета Слонімская”
Мы пагарталі PDF-старонкі “Газеты Слонімскай”, якая пабачыла свет роўна 20 гадоў таму, напрыканцы кастрычніка 2000 года, і ўспомнілі, якія падзеі адбываліся з намі ў той час.
У Слоніме напрыканцы кастрычніка 2000 года прайшоў восеньскі кірмаш, на якім гандлявалі не толькі сельгаспрадукцыяй, але і шашлыкамі.
Калі слонімцы елі шашлыкі на Опернай ды куплялі парасят, то ўлады Беларусі чакалі расійскія грошы — крэдыт ад РФ на 4,5 мільярда расійскіх рублёў.
Праз два тыдні павінен быў запрацаваць новы парламент, падобны на папярэдні.
Здаецца, мінула 20 гадоў, а нічога ў гэтым кірунку ў краіне не змянілася. Нейкае адчуванне дэжавю.
Хаця тады яшчэ планавалі ўводзіць агульную грашовую адзінку з Расіяй.
З моманту знікнення тэлеаператара Дзмітрыя Завадскага прайшло 111 дзён — на 1-й старонцы «ГС» вяла такі адлік.
Лябедзька падаў тады ў суд на Лукашэнку — за яго словы, што той адпрацоўвае 1,5 тысячы даляраў, атрыманых ад грантадаўцаў.
У Слоніме ў 2000 годзе здымалі фільм пра вядомага калекцыянера і краязнаўцу Міхаіла Рылко.
Слонімскі рэтранслятар, які быў запушчаны ў 1965 годзе, шукаў спонсара.
А ў Мастах загадчык аддзела культуры райвыканкама Свістуноў не даў дазвол на выступленне кампазітара Ігара Лучанка. Спаслаўшыся на тое, што Лучанок не мае ліцэнзіі на канцэртную дзейнасць.
“Газета Слонімская” яшчэ магла напісаць тады, хто нарадзіўся на Слонімшчыне, хто ажаніўся і хто адышоў у лепшы свет. Такую інфармацыю даваць пасля забаранілі.
У спартыўным жыціі было таксама не без драматызму — “Камунальнік” з вышэйшай лігі вяртаўся ў першую.
Калі вы хочаце пачытаць пабдрабязней пра падзеі 2000 года, пераходьце па спасылцы на PDF-версію нумара.