Чарговая алея пасаджана
У мастаўлян стала добрай традыцыяй увосень саджаць паркі і алеі. У гэты раз паўстала алея па вуліцы Зялёнай каля спартыўнай школы. Да пасадкі дрэў прычынілася кіраўніцтва раёна.
З гэтай нагоды варта ўспомніць лёс раней пасаджаных алей і паркаў.
Бадай, самы першы парк быў закладзены ў пачатку 90-х гадоў на пустыры між праспектам Юнацтва і вуліцай Гастэлы. Саджанцы бярозы, клёна, ліпы і іншых дрэў тут не прыжыліся.
Неўзабаве паўстаў касцёл, затым былі збудаваны гандлёвыя шапікі. Цяпер нічога не сведчыць, што калісьці тут быў закладзены парк.
Другі парк неўзабаве быў пасаджаны за домам №2 па праспекце Міру. Праз год яго не стала. Цяпер там можна пабачыць толькі некалькі дрэўцаў.
Па праспекце Міру ў свой час была закладзена алея маладажонаў. Па задуме маладажоны тут павінны былі пасля рэгістрацыі шлюбу пасадзіць дрэўца. Аднак ініцыятыва засталася ініцыятывай і алеі не атрымалася.
Некалькі гадоў таму назад каля Дома культуры была высаджана алея ў гонар першай гераіні Сацыялістычнай працы на Мастоўшчыне Домны Варац. Цяпер у гэтай алеі налічваецца каля дзясятка дрэўцаў, астатнія засохлі.
Засохла палова дрэўцаў і ў парку, які паўстаў за касцёлам па праспекце Юнацтва. Зараз парк стаў месцам для сабачага выгулу.
Атрымлівалася тое таму, што ніхто пасля пасадкі за саджанцамі не даглядаў. Пасадзілі і забылі.
Што станецца з сёлетнімі пасадкамі — пакажа час.