Угнаны ў Слоніме «Ford Escort» знайшлі ў Ружанах
Пра ўгон легкавіка «Ford Escort» з двара аднаго з дамоў на вуліцы Новай у Слоніме ў міліцыю паведамілі 28 лістапада, інфармуе УУС Гродзенскага аблвыканкама.
«Форд» на дарозе
Як стала хутка вядома, 44-гадовы гаспадар машыны пакінуў яе адкрытай і з ключамі ў замку запальвання, чым і скарысталіся двое маладых угоншчыкаў.
Знайшлі ўгнаны «Форд»
Слонімскія супрацоўнікі крымінальнага вышуку знайшлі ўгнаную машыну ў Ружанах у тэхнічна няспраўным стане. Як апынулася, угоншчыкі залілі бензін у бак дызельнай машыны пры яе запраўцы.
Будуць буксіраваць у Слонім
Пры правядзенні праверкі пад падазрэнне ва ўгоне трапілі 18 і 20-гадовы слонімцы. Па версіі міліцыі, маладыя людзі вечарам выкацілі легкавік з двара пасля таго, як убачылі, што ў кватэры ўладальніка патухла святло. Потым яны завялі аўто і паехалі ў Ружаны. Пры развароце машына ў іх заглохла і не заводзілася. Тады хлопцы купілі на заправачнай станцыі бензін і залілі ў бак. Аднак рухавік у машыны быў дызельны і запраўка бензінам прывяла да сур’ёзнай няспраўнасці. У Слонім маладыя людзі вярнуліся ўжо без машыны.
Раней да крымінальнай адказнасці западозраныя ва ўгоне не прыцягваліся. Цяпер правяраецца іх магчымая датычнасць да іншых падобных злачынстваў, адзначае рэсурс абласной міліцыі.
