Пахвалілася зберажэннямі — і засталася без 10 000 даляраў
Адбылося гэта з 39-гадовай жыхаркай Ваўкавыска 2 снежня падчас сумеснага распіцця спіртных напояў са знаёмымі ў яе дома, паведамляе сайт УУС Гродзенскага аблвыканкама.
Жанчына некалькі разоў паказвала даляры 33-гадоваму неаднойчы падсуднаму мужчыну і 40-гадовай жыхарцы Ваўкавыска, якая раней таксама мела праблемы з законам. Пры адным з такіх паказаў мужчына выхапіў у гаспадыні жытла грошы, пасля чаго сышоў адтуль са сваёй знаёмай.
Пацярпелая звярнулася па дапамогу ў Ваўкавыскі РАУС. У той жа дзень міліцыянеры знайшлі няўдзячных гасцей у Свіслацкім раёне, аднак пры іх былі выеўлены не ўсе ўкрадзеныя грошы. Па словах затрыманых, частку даляраў яны патрацілі на свае патрэбы, а таксама аддалі пазыкі.
Затрыманыя ўзяты пад варту. Ім інкрымінуюць адкрытае завалоданне чужой маёмасцю ў буйным памеры, адзначае рэсурс абласной міліцыі.