102 чалавекі атрымалі пераломы ў выніку аварыі ў пекінскім метро
Агулам 515 чалавек былі адпраўлены ў бальніцу для абследавання пасля аварыі, якая адбылася ў пекінскім метро напярэдадні вечарам, у 102 чалавек былі выяўлены пераломы. Аб гэтым паведамілі мясцовыя ўлады, канстатуе БЕЛТА
Раней паведамлялася сама меней пра 30 пацярпелых. Выпадкаў са смяротным зыходам зафіксавана не было.
Надзвычайнае здарэнне адбылося на лініі Чанпін. Папярэдняе расследаванне паказала, што слізкія з-за снегу пуці прывялі да экстраннага тармажэння і спынення ідучага наперадзе цягніка. Другі цягнік, які ішоў ззаду і знаходзіўся на ўчастку спуску, заслізгаў і не змог затармазіць, у выніку чаго адбылося сутыкненне.
Па стане на раніцу 15 снежня з бальніцы выпісаны 423 чалавекі, 25 знаходзяцца пад медыцынскім наглядам, яшчэ 67 шпіталізаваны.
Муніцыпальныя ўлады арганізавалі следчую групу для далейшага расследавання прычын здарэння і ацэнкі мер рэагавання.
14 снежня на сталіцу Кітая абрынуўся моцны снегапад, адзначаецца ў паведамленні.
