Няврэмӆам ёӆан рут ясңа утаӆтаӆӆам
Ар ханшӆув па потарӆув рут ясаң шавиты па еӆӆы туты вер эӆты. Щишан, хота муй ясаң па айкеӆ щи вер туты хоятат эӆты хуӆӆув, мохты ханшӆув. Тата ма Надежда Русскина Ёмвош округ Сургутской район эӆты потар туӆам. Туняӆ таӆ Надежда Пулңават вошан оӆаң пуш ус, «Российской Север» манам порайн рут ясаң пиӆан рупитты харан рупитас. Уӆапсаеӆ па рупатаеӆ эӆты потартас: «Аңкем-асем уӆты куртэван уӆӆув. Ӆув Когалым вош эӆты ветъяң километрайн, Равенское месторождение хутмет таща ӆуңтасӆув. Сита туп кат хот омасаӆ, аңкем-асем па ма семьяем. Аңкем — Зинаида Ивановна Кечимова, асем — Степан Антонович Кечимов. Вуӆэт шавиман, хуӆ-вой веӆпасӆыман уӆӆув, вонсямот, толах акатӆув, нохар сэңкӆув, тыныӆув. Округеван манты вуӆы ёх емаң хатӆатан касӆув. Тамась тахайн ма оӆаң пуш усам. Ёмвош округан «Лидеры единства» форума кат пуш яңхсам. Там йис ай няврэмат па энамты ёх рут ясңеӆ ант уятӆэӆ, потарты ант ӆытӆайт. Там харан, хоты уӆты тахаеван рупатаев манаӆ, хоты рут ясңев еӆӆы туӆэв па няврэмӆув утаӆтаӆӆув, потартсам. «Ун аңкиӆув, ун ащиӆув потартам ясңеӆ шавиӆув» харан рупитсам. Хоты уӆты тахаеван рупатаев манаӆ, хоты рут ясңев еӆӆы туӆэв па няврэмӆув утаӆтаӆӆув, потартсам. Хор: Альбина Тырлина. Куртэван «Унт ашкуӆа» тайӆув. 2021-мет таӆан Сургутской районан оӆаң IT-ашкуӆа пуншса. Сит оӆаң пилотной проект ус. Ин округев хуват ӆапаткем симась ашкуӆа рупитаӆ. Там таӆан оӆаң няӆ няврэм си ашкуӆа етшаптас, кат таӆ утаӆтысат. Ин яӆпа няврэмат акатӆув. Уӆты тахаев Русскинской ашкуӆая ӆуңтасаӆ. Московской программа хуват рупитӆув. Няврэмӆув онлайн сирн утаӆтысат. Русскинской вошан ай няврэмат утаӆтаты нэ Галина Зеленова ӆув пиӆаӆан рупитас. Кашң хатӆ кат, хуӆам урок: математика па русь ясаң. Хуӆмет — природоведение па па отат. Няврэмат айт, сишан хус минут урокаӆ манаӆ. Муң няврэмӆув па хорпет, хун вош интерната уӆты, утаӆтыты манӆат, ӆувиӆаӆа шеңк ӆаварт. Куртаң няврэмат хун ашкуӆая утаӆтыты ёхатӆат, ӆуңатты, ханшты хошӆат. Хасям таӆан ма магистратура етшаптасам, рут ясаң утаӆтыты нэңа рупитты верытӆам. Ин нэпекӆам китсаӆӆам, вуӆайм ки, няврэмат утаӆтаты питӆам». Альбина Тырлина ханшам потар
