Сусан щутщаты пора
Кашӊ таӆ, округ няврэмӆув, хошам муват пеӆа яммаӆтаты па щутщаты яӊхӆат. Щи вер ураӊан, ай тахайт потты тыӆащ кимет хатаӆан, льготной категорияя ӆуӊтасты няврэмата щутщаты заявка маты вер пуншса. Там сусан эвет па похат, Тюменской областян уӆты «Ребячья республика», «Олимпийская ребячка», «Остров детства» хуӆам лагеря па «Остров Мадагаскар» питы щарас питаран уӆты йи лагеря щутщаты манӆат. «Заявка маты ураӊан мосаӆ «ЯНАОтдых» порталан ханшӆтантыты, шошия уӆты вош пирыты па личный кабинет хуват заявка маты. Пирыйм лагеря места антом ки, заявка «резерва» маты мосаӆ. Пора хащты юпийн, ёвра ханшам заявкайт нох пайтӆайт па яма ханшам отат нох эӆӆаӆат. Няврэм лагеря китты порайн, юш нэпек ураӊан ох сохаптаты туп мосаӆ па щеп охан маты. Щутщаты путёвкайт округ хуват ӆутман уӆӆат. Там таӆ льгота ант вуйӆыйм, тыӆащ вуты охаӆ шимӆа хойты хоттэӆат па СВО харатан уӆты хоятат няврэмӆаӆ юш нэпека посатам охӆаӆ, щутщийм юпийн, ёхӆы сохаптаӆайт», — Ирина Леонидовна Шевченко Пулӊават вошан няврэмат щутщаты китты отделан рупитты нэ ястас. Федеральной па окружной субсидия яха понасман, шоши мувеван хуӆмет таӆ «Дети Арктики» программа хуват няврэмата йи матты лагеря манты юшаӆ сохаптаӆа. Там пуш ветмет класс эӆты нийӆмет класс унты утаӆтыты няврэмат «Остров Мадагаскар» Краснодарской край уӆты лагеря, тын щах ант сохаптаман, манты верытӆат. Няврэм ханшӆтаты порайн, моӆты ант ки тыйӆ там телефонат хуват: +7(912) 071-50-37, +7(912) 071-50-39 инщасты рахаӆ. Зоя Куртямова ханшам потар
