Ашкуӆаятан яӆпа этаӆтыты верат
Хащам ятан турамсот яӆап мутрайт этаӆтаӆайт. Ӆув кутэӆан искусственной интеллект. Щит эӆты Харсаяман ун потар верса. Кущайт, няврэмат утаӆтыты нэӊат па ёхат яха актащисат. Тамащ яӆпа этам вер Ольга Николаевна Пандо Аксарка эӆты няврэмат утаӆтыты порайн шеӊк ванан тайӆаӆӆы. Ӆув ЯНАО региональной эксперта уӆ, Кев сыӆ район хуват няврэмат рут ясӊа утаӆтыты тахайн сетевой платформа кущая ӆуӊтасаӆ. Анатолий Николаевич Рыбаков пиӆан аратаӆ мир яха акатсаӊан. Потарсаӊан, хоты ашкуӆа няврэмат утаӆтаты порайн искусственной интеллект нётаӆ. Ольга Николаевна щи веран каматса ясаӊ ястас: «Ма хуван там мутра «Ассистент преподавателя» пиӆан рупитты питсам. Няврэмат утаӆтыты порайн шеӊк нётаӆ. Манты урок иса ханшантаӆ, щита ныӆа: аратаӆан каман ясаӊ урок манты сыс ястаман уса, муй хорпи ясӊат рахаӆ туп йи пуш ястатыя… Щит вантӆэн па оша понӆэн, хоты сахат наӊ рупатаен туӊашак еӆӆы туты мосаӆ. Там йисан муӊ няврэмат пиӆан турамсот сетевой платформаятан рупитӆув, касапсаята этӆыӆув — щишан ун онтас туӆ. Щи рупатаев тувман, кашӊ пуш вантман ямшака тыйӆ». Хоты там вер пиӆан па утаӆтыты нэӊат па ёхат рупитӆат, щит эӆты Айсудур Артурович Белеков па Алёна Юрьевна Ерёменко потарсаӊан. Актащам хоятата мастер-класс альсат. Кашӊ хоята сама ӆоӊас яӆап вер, еӆӆы хатӆатан ӆув ашкуӆайӆаӆан ищи туты ӆаӊхаӆайт. Щи веран шеӊк ям, хун муӊ няврэмӆув ошаӊ-щащаӊ утаӆтыты хоятатан утаӆтаӆайт, па ӆув ӆаӊхаман ашкуӆая яӊхты питӆат. Аллина Тоярова ханшам потар
