Ирон театрæн радта йæ уд
Театр… Ирон театр – культурæйы, мадæлон æвзаджы артдзæст. Уый у культурæйы айдæн, нæ ирон удыхъæд, нæ хорз æгъдæуттæ бирæвæрсыгæй кæм разынынц, ахæм арфæйаг галуан. Ирон театры аивады тыххæй сæрмагондæй дзургæйæ, цæстытыл фыццаджыдæр ауайынц, кæй зæгъын æй хъæуы, йæ бындурæвæрджытæ. Ирон театры хъысмæт æмæ фидæн уыдонæй аразгæ кæй уыд, уыцы хæс сæхимæ райстой, æмæ, хуыздæр уæвæн нæй, афтæ йæ æххæст кодтой сæ фæстаг сулæфты онг. Æнусты фæстæ дæр сæ кад, сæ намыс, сæ нæмтты рухс нæ бамынæг уыдзæн.