Бүгенге яшьләр Ленинны беләләрме? (Сораштыру)
“Ленин туган бабабыз” дип җырлый иде Советлар Союзы чоры балалары. Аның исеме белән яшәдек, эшләдек. 22 апрельдә Коммунистлар партиясенә һәм Совет дәүләтенә нигез салучы шәхес Владимир Ильич Ленин туган көнгә 145 ел була. Кызык, бүгенге буын балалары әлеге шәхес турында нәрсә беләләр? Кем ул Ленин – бу сорауны мәктәп укучыларына һәм студентларга юлладык. Азат ӘБЕЛХАНОВ, Ульяновск дәүләт университеты студенты: -Ул революционер, оппозиционер. Социалистик дәүләт төзегән. Илдә эшче пролетариат идарә итүен теләгән, җирне крестьяннарга кайтару өчен тырышкан. Коммунистлар партиясенә нигез салган. Илдә революцион үзгәрешләр ясауны оештырырлык көчле сәясәтче, шәхес булган. Рафис ГАФИЯТУЛЛИН, Казан социаль-гуманитар техникумы студенты: - Ленинның гәүдәсе Мәскәүдә мавзолейда саклана. Ул коммунизм төзүче. Әти-әниләрем аның идеологиясе буенча яшәгәннәр: октябрятлар, пионерлар, комсомоллар булганнар. Советлар Союзында аңа һәр шәһәрдә һәйкәл куелган. Алия ГЫЙСМӘТУЛЛИНА, 5нче сыйныф укучысы: - Ул бик зур кеше булган. Элек аның турында бик яңгыравыклы җырлар җырлаганнар. Илнар ГЫЙЛЬМЕТДИНОВ, армиядән яңа демобилизацияләнгән: - Ленин ул заманның президенты кебек булган. Шәһәрдә үзәк паркта аның һәйкәле әле дә тора. Дөресен генә әйткәндә, мин аның турында шуннан артыгын белмим. Ә сез бу хакта ни уйлыйсыз? Фикерләрегезне безнең сайтка язып җибәрегез.
