Татарстанда 260тан күбрәк кешене талпан тешләгән
Иң күп очраклар Казанда, Әлмәт районында, Яр Чаллыда, Түбән Кама, Лениногорск районнарында теркәлгән. Бәхеткә, безнең районда талпаннан зыян күргән кешеләр юк әлегә. Әмма тынычланырга ярамый. Аларның иң актив вакыты май-июнь һәм август-сентябрь айларына туры килә. Талпаннар сукмаклар тирәләрендә күп була һәм кешеләргә үләннәрдән үрмәлиләр. Гадәттә, талпан тешләгәне сизелми. Аны тәннән тизрәк алган саен яхшырак – төрле авырулар чыганакларының микъдары азрак күчәчәк. Ә талпан талпан энцефалиты, геморрагик бизгәк авырулары сәбәпчесе булырга мөмкин. 1 номерлы зона эзләү-коткару отряды начальнигы Игорь Бычков моңа юл куймас өчен табигатькә чыкканда ачыграк төстәге кием кияргә, чалбар балакларын аяк киеменә яисә оекка, өске киемне чалбарга кыстырырга, чәчне җыярга, баш киеме кияргә, киемне талпанга каршы махсус препаратлар белән эшкәртергә, чирәмгә утырмаска, ятмаска киңәш итә. Өске киемне, урманнан алып кайткан әйберләрне, үсемлекләрне өйгә алып кермәвең дә хәерле. Тәнгә талпан кадалганда, мөмкин кадәр тизрәк дәваханәгә мөрәҗәгать итәргә кирәк.
