Кечкенә палатадан башланган заманча реанимация
Бүген дәваханә системасын реанимация бүлегеннән башка күз алдына да китереп булмый. Ә ике дистә ел авыр хәлдәге пациентлар хирургия бүлегендәге бердәнбер палатада яңадан тормышка кайтарылганнар иделәр. Заманча реанимация бүлеге ачу элеккеге баш табиб-хирург Нил Фәйзетдинов идеясе. Авыр хәлдәге пациентлар өчен махсус палата гына бик кечкенә һәм җайсыз булуы күптән борчып килә аны. Җитмәсә саллы лабораториясе дә бар, ә нигә реанимация бүлеге ясамаска?! Күпмедер кадрлар потенциалы да булгач, баш табиб югарырак органнарга мөрә-җәгать итә. Компетентлы җитәкченең сүзе үтә. Реанимация бүлеге булсын дия-дия, эш кабинетыннан да колак кага, дөресрәге, үзе теләп бирә. Шул рәвешле, 1995 елның 26 маенда 12 сәгать 35 минутта табиблар реанимация бүлегенә беренче пациентны Карлыдан Сәлимҗан Гыйззәтовны кабул итәләр. Дүрт койка урнаштырыла. Анестезиолог-реаниматологлар Рөстәм Сә-мәрханов, Светлана Полянская һәм Рәшит Әф-ләтунов (бүгенге көндә мәрхүм) яңа бүлектә, өр-яңа медицина приборлары ярдәмендә эшли башлыйлар. Өлкән шәфкать туташы Людмила Шахаева да беренче көннән шунда. Барысы турында да ул сөй-ләде безгә. Шәфкать туташлары Василә Алеева, Альфрида Дроздова гомерләрне саклап калуны секундлар хәл иткәндә уңайсыз шартларда эшләп, монда күчкәч җиңел сулап куялар. 2009 елда дәваханәдә йөрәк-кан тамырлары үзәге ачыла. Җитәкчелек реанимация белән үзәкне берләштерергә карар кыла. Балалар бүлеге яңа бинага күчерелеп, шунда урнаша. Йөрәк-кан тамырлары авырулары өчен тугыз, гомум-профильле, хирургия авырулары өчен өч урын билгеләнә. Быел реанимация кабат беренче урынына кайтты. Моның белән йөрәк-кан тамырлары үзәгенә күбрәк мәйдан бирелде. - Дәваханәнең беренче катында урнашкан яңа урында мөмкинлекләр тагын да артты, - ди Людмила Юрьевна. Һәр пациентны тәүлек әйләнәсе кан басымын, йөрәк тибешен, тын алуын күзәтеп баручы кардиоманиторинг системасы тикшереп тора. Авыруның гомуми хәлен күрсәтә ул. Тән бозылуларына каршы торырлык күпфункцияле караватлар җиһазланган. Һава алмашынып тора, пациентлар видеокүзәтү астында. Аларны хәтта сәламәтлек саклау министрлыгы аша да күзәтәләр. Менә шулай дүрт урынлык гади палатадан башланган реанимация бүген зур шәһәрләрдәге төрдәш бүлекләр көнләшерлек үзгәреш кичерде. Табиблар Светлана Полянская, Евгений Одинцов, Наилә Галимҗанова тәүлек әйләнәсе пациентлар сәламәтлеге пульсында тора. Шушы көннәрдә бу коллектив 20 еллык юбилейга җыелды. Әлеге вакыт эчендә дәвалау эшендә зур алга китешне барладылар, эш шартлары уңайлануга, кешеләрне яңадан тормышка кайтару мөмкинлеге зураюга чын күңелдән шатландылар. Наилә СОЛТАНОВА.
