Арефьев урамына асфальтны кич җәяләр
Ниһаять, Арефьев урамының Ефремовтан алып өскә табан өлешендә дә юлларга асфальт җәелә башлады. Бүген иртән әлеге урамнан узучы автомобильчеләр үз күзләренә үзләре ышанмаганнардыр, чөнки якшәмбе кичендә генә иске, чокырлы юллардан йөрделәр. . “Волгодорстрой” оешмасы юлчылары эшне кичке 17 сәгатьтән генә башладылар. 22 сәгатьтә 50 метрга якын арага шома юл бар иде инде. Бүген, дүшәмбе киченә, эшне төгәлләргә исәплиләр юлчылар. Автомобильчеләр өчен тагын бер сөенче: шәһәрнең Совет урамындагы үтә дә куркыныч хәлгә килгән юлларда да асфальт салу башланды. Хәзерге вакытта вокзалдан алып “МСО” бинасына кадәр тигез асфальт юл ясалды.
