Кырык Садакта яңгыр иште, Буада яуды, Кыятта таммады да
3 июнь кичендә Буа районы өстенә куе болытлар торды. Иң күп яңгыр Кырык Садак авылында яуды. Ярты сәгать тирәсе бертуктаусыз койган. Юл уңаеннан Тимбай җирле үзидарәсенә караганТашкичүгә дә эләккән әле. Янтуганда да аз гына төшкәләгән, ә Вольнистанга тамчы да эләкмәгән. Иске Суыксу, Боерган, Түбән Наратбаш, Кыят якларында яңгыр бер дә яумаган. Зур Фроловода, Ырынгыда, Карлыда, Адав-Толымбайда, Тутайда, Кыр Тәүгелде дә азрак яугалап киткән. Буа шәһәрендә кичке дүртләр тирәсендә башланган яңгыр 20 минут чамасы дәвам итте. Бакчачылар туфракка 2-3 сантиметр үткән, бүгенгә яшелчәгә су сипмәслек булган, диделәр. Синоптиклар атна ахырында явым-төшемнәр тагын көтелүен хәбәр итә.
