Буалы спортчылар “Авыл яшьләре” уеннарына юл алды
Быел тугызынчы “Авыл яшьләре” җәйге авыл спорт уеннары Мамадышта уза. 29 июньдә старт алган һәм 5 июльгә кадәр дәвам итәчәк бәйгеләрдә республиканың 43 районыннан 1,5 мең тирәсе кеше катнашыр дип көтелә. Буалылар 70кә якын кешелек делегация белән барачаклар. Бер төркем спортчылар анда көчләрен сыныйлар инде. Бүген уеннарга туристлык күптөрлелек, спорт гаиләләре, өстәл теннисы буенча һәм башка ярышларда катнашучылар киттеләр. Татарстанның Авыл хуҗалыгы һәм азык-төлек һәм Яшьләр эшләре, спорт һәм туризм министрлыклары тарафыннан үткәреләче әлеге авыл яшьләре уеннарында механизаторлар һәм сыер савучылар да көчләрен сынаячаклар. Ә барлыгы ул 16 спорт төре буенча уза. Буа командасына җиңүләр телибез!
