Яңа Тинчәледә яшәүче 30 яшьлек ир-ат алтынчы тапкыр хөкем ителде
М. агымдагы елның 12 маенда кеше кыйнаган һәм үлем белән янаган өчен Буа районының 2 номерлы суд участогының Җәмәгать суды тарафыннан 1 ел да 8 айга иреген чикләүгә хөкем ителгән иде. Алтынчы тапкыр. 2 июньнән ул Буа җәза үтәтү инспекциясендә исәптә торган. Әмма, инспекция начальнигы Нияз Закиров әйтүенчә, төзәлергә уйламаган да – исерткеч эчемлекләр белән мавыккан, теркәлүгә килмәгән, җәмәгать тәртибен бозган һәм моның өчен административ җаваплылыкка тартылган. 19 августта Буа шәһәр суды карары белән аңа карата өстәмә чикләү куелган – массакүләм һәм башка чаралар үткәрелүче урыннарга йөрмәскә, аларда катнашмаска. Тик М. моны да, җәзаны реаль үтәү мөмкинлеге турында рәсми кисәтүләрне дә “колак аша гына үткәргән”. Нәтиҗәдә 8 айга һәм 12 көнгә катгый режимлы төзәтү колониясенә җибәрелгән. 1 номерлы суд участогының Җәмәгать суды 10 сентябрьдә аңа карата шундый карар чыгарган.
