ШАЯНТУЙ
[img="http://sabantuy.net/uploads/images/default/2jghjuv1.jpg" border="0" vspace="4" hspace="4" width="158" height="118" align="Left"]2jghjuv1.jpg (20.22 Kb)[/img][b]БАРЫП ЧЫКМАДЫ...[/b]
Озын тәнәфес вакыты иде. 9нчы сыйныфта һәрвакыттагыча ыгы-зыгы, шау-шу, этеш-төртеш... Алсинә һәм Гөлсинә орифлэйм компаниясе чыгарган яңа сәгать турында фикерләшә. Айдар белән Айнур иртәгә «Ак Барс»ның ничә гол кертәчәге хакында гәп куерта. Радик шигырь яза. Алсу оекбаш бәйли. «Хыялый» кушаматы алган Зөфәр мәхәббәт турында китап укый. Фәрит белән күзлекле Кәримә шахмат уйный. Кыскасы, һәрберсенең үз шөгыле.
Шулвакыт кемдер кычкырып җибәрде:
— Шухер!!! Габдуллыч килә!!!
«Габдуллыч» дигәннәре инде мәктәптә утыз елга якын мәктәп директоры булып эшләгән Усман Габдуллович иде. Сыйныф тынып калды. Һәммәсе үз партасына чапты. Шулчак кабинет ишеге ачылып китте, һәм ишектән Усман абзый белән кулына китап-дәфтәр күтәргән таныш булмаган бер яшь кыз керде. Күзлекле Кәримә класста чыш-пыш таратты: «Яңа физика укытучысы икән!» Ул арада сүзне директор алды:
— Таныш булыгыз, бүгенге көннән алып, сездә физика дәресләрен Роза Марсовна укытачак. Яшь укытучы белән... Галимов! Ник тартасың ул Алсинәнең чәчен!.. Яшь укытучы белән үзегезне тәртипле тотыгыз...
Әлеге яңалык класста зур кызыксыну тудырды. Һәрберсенең яңа укытучыны ничек тә булса сынап карыйсы килә иде. Укучыларның башында төрледән-төрле мәкерле планнар туа башлады. Сүзне Алсинә белән Гөлсинә башлады:
— Әйдәгез, тактага сабын сөртәбез, һәм аңа язу мөмкин булмаячак!
— Урындыгын кисеп куярга кирәк! — диде Фәрит.
«Хыялый» Зөфәр исә:
— Мәхәббәт турында сораулар бирергә кирәк аңа... — диде.
— Миндә уенчык тычкан бар. Сыйныф идәне буенча шуны җибәрергә кирәк. Мин беләм: шәһәр кызлары тычканнан курка, — диде Алсу.
— Туфлиләрен күрдегезме, туфлиләрен! Идәнгә су тамызып куйсаң, тая да егыла! — диде күзлекле Кәримә.
Икенче көнне физика дәресенә барысы да «әзерләнгән» иде. Такта сабын белән сөртелгән, укытучы урындыгы киселгән һәм ишек төбендә зур булмаган күлләвек ялтырап ята.
Дәрескә кыңгырау шалтырады. Ишек ачылды. Укытучы керде.
— Исәнмесез, укучылар! Хәерле көн! Утырыгыз! — диде Роза Марсовна.
Тик никтер ул күлләвеккә таеп егылмады, аны бөтенләй күрмичә, янәшәсеннән узып китте.
— Бүген контроль эш эшләячәкбез, — дип башлады сүзен яшь укытучы. — Биремнәр ике вариантта. Тактага язып, сезнең вакытыгызны алмас өчен, һәрберегезгә дә биремнәр аерым биттә булачак.
Укытучы биремнәрне таратып чыкты да өстәлгә сөялеп тора башлады. Фәрит дәшмичә булдыра алмады:
— Утырып торыгыз, Роза Марсовна.
— Рәхмәт, Галимов. Мин, басып, сезнең күчерү-күчермәвегезне карап торам.
Башка барлык планнар да тормышка ашмады. Алсу ничә тапкыр уенчык тычканын идәнгә атып карамасын, укытучы аны күреп кычкырмады. Зөфәр дә үзенең сорауларын бирергә кыймады.
Дәрес беткәнен белдереп, кыңгырау шалтырады. Укытучы сүз алды:
— Дәресләрегез бетте, димәк, тактадагы сабынны юып ала аласыз, идәнне дә сөртегез, урындыкны төзәтегез. Иртәгә беренче дәрес — физика, тикшерәм! Өй эше: номер унсигез. Сау булыгыз!
Бөтен сыйныф шаккатты. Һәммәсе дә бер-берсеннән шикләнде.
Алты дәрес беткәч, 9нчы Б сыйныфына кереп карасагыз, анда урындык төзәтеп ятучы Фәритне, ышкый-ышкый такта юучы Алсинә белән Гөлсинәне, идән сөртүче Кәримәне һәм тырышып-тырышып физика китабы укучы Зөфәр белән Алсуны күрергә була иде.
Их! Килеп чыкмады бит яшь укытучыны сынау... Кем белсен соң аның инде моңарчы өч мәктәптә укытып, «Атказанган укытучы» исеменә лаек булганын...
Их-х!
Илүзә ГАЙНЕТДИНОВА,
11нче Б сыйныфы.
Апас, Каратун.
