Адыгеим илIыкIохэр Беларусь щыIэх
Хэхъоныгъэхэм афэIорышIэщт мы уахътэм поселкэу Инэм щашIырэ промышленнэ паркыр.
Адыгеим илIыкIо купэу АР-м иминистрэхэм я Кабинет ипащэ игуадзэу ЛIыхэсэ Махьмудэ зипащэр Республикэу Беларусь икъэлэ шъхьаIэу Минскэ мы мафэхэм щыI.
Купым хэтых АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур, гъэсэныгъэмрэ шIэныгъэмрэкIэ министрэу Евгений Лебедевыр, АР-м и ЛIышъхьэ иIэпыIэгъоу Хьакъунэ Бэллэ.
Къыткъот къэралыгъоу зыдэкIуагъэхэм зэIукIэгъухэр щыряIэщтых, гъэсэныгъэм, промышленностым, мэкъу-мэщым алъэныкъокIэ зэрэзэдэлэжьэщтхэм зэдытегущыIэщтых.
Тыгъуасэ ЛIыхэсэ Махьмудэ «Белгоспищепром» зыфиIорэ концерным итхьаматэу Олег Жидковым IукIагъ. ЛъэныкъуитIур Урысыем ишъолъыррэ Беларусьрэ ясатыу зэфыщытыкIэхэм язегъэушъомбгъун тегущыIагъэх.
IэкIыб сатыум щагъэзекIорэм хэгъэхъогъэныр, экспортымрэ импортымрэ алъэныкъокIэ амалэу яIэхэм япхырыщын лъэныкъуитIуми апшъэ агъэуцурэр. БлэкIыгъэ илъэсым Беларусь къыращырэ товарэу Адыгеим щыIуагъэкIырэр хэпшIыкIэу нахьыбэ хъугъэ. ЛъэныкъуитIум сатыоу зэдашIырэм фэдизрэ ныкъорэ хэхъуагъэу 2024-рэ илъэсыр рагъэжьагъ. МашинэшIыным щагъэфедэрэ продукцием икъегъэолIэнкIи Беларусь пэрытныгъэр зэриIыгъыр зэIукIэгъум къыщыхагъэщыгъ.
АР-м и ЛIышъхьэу КъумпIыл Мурат промышленнэ къыдэгъэкIыным зегъэушъомбгъугъэным, IэкIыбым продукциер гъэкIогъэнымкIэ амалэу шъолъырым иIэхэр пхырыщыгъэнхэм, хъызмэтшIапIэу къыдэгъэкIыным пылъхэм яIофшIэн хэгъэхъогъэным анахьэу анаIэ зэрэтыраригъадзэрэр ЛIыхэсэ Махьмудэ къыхигъэщыгъ.
Хэхъоныгъэхэм афэIорышIэщт мы уахътэм поселкэу Инэм щашIырэ промышленнэ паркыр. Гектар 200 хъурэ чIыгоу, бизнесым амалышIухэр къезытэу, транспортнэ-инженернэ инфраструктурэу ищыкIагъэр зыщыгъэпсыгъэм къыдэгъэкIыным фытегъэпсыхьэгъэ хэушъхьафыкIыгъэ площадкэшхо иIэщт. Мы промышленнэ паркыр затIупщыкIэ, республикэм исатыу-экономическэ зэпхыныгъэхэм заушъомбгъуным ар фэIорышIэщт.
Тыгъуасэ гъэсэныгъэмкIэ Беларусь иминистрэу Александр Бахановичрэ АР-м гъэсэныгъэмрэ шIэныгъэмрэкIэ иминистрэу Евгений Лебедевымрэ зэIукIэгъу зэдыряIагъ. ТапэкIэ Iоф зэрэзэдашIэ-
щтым ахэр зэдытегущыIагъэх. Зигугъу ашIыгъэхэм ащыщых гъэсэныгъэм шIыкIэу щагъэфедэхэрэмкIэ зэрэзэдэгощэщтхэр, специалистхэм ягъэхьазырын ыкIи яшIэныгъэхэм ахэгъэхъогъэныр, машинэшIыным, автомобильхэм яфэIо-фашIэхэм ягъэцэкIэн, энергетикэм, къыдэгъэкIын промышленностым алъэныкъокIэ кIэлэегъаджэу гурыт профессиональнэ гъэсэныгъэ языгъэгъотыхэрэм стажировкэ ягъэкIугъэнымкIэ программэм ипхырыщын.
Адыгеим икIыгъэ лIыкIо купыр мэфиплIэу къызытыщтым шIэныгъэхэмкIэ Беларусь и Лъэпкъ академие, промышленностымкIэ, гъэсэныгъэмкIэ, мэкъумэщ хъызмэтымкIэ ыкIи къыдэгъэкIынымкIэ министерствэхэм, машинэшI компаниеу «АМКОДОР» зыфиIорэм, къэралыгъо технологическэ университетым, ныбжьыкIэхэм я Союз ащыIэщтых. Джащ фэдэу Хатынь исаугъэт зэхэт къэгъэгъэ блэрхэр кIэралъхьащтых.
ЗэIукIэгъухэм ыкIи зэдэгущыIэгъухэм якIэух зэфэхьысыжьхэм къапкъырыкIхэзэ, АР-м иминистрэхэм я Кабинетрэ Республикэу Беларусь и Правительствэрэ сатыу-экономическэ, научнэ-техническэ ыкIи социальнэ-культурнэ зэдэлэжьэныгъэу зэдыряIэщтым фэгъэхьыгъэ Зэзэгъыныгъэм зэдыкIэтхэщтых, 2024 — 2026-рэ илъэсхэм ар пхырыщыгъэ зэрэхъущт планыр агъэнэфэщт.
