10 мая 2015 года в Буинске

10.05.2015 14:38

Буалы егет-кызлар билбаулы көрәш буенча Россия беренчелегендә призлы урыннар алдылар

15-17 яшьлек егетләр һәм кызлар арасындагы әлеге бәйге Казанда узды. Буа көрәшчеләре аннан өч өченче урын алып кайттылар. Иске Тинчәледән Гөлкәй Ильясова – 70 килограммнан югарырак, Адав-Толымбайдан Виолетта Валиуллина – 44 килограммга кадәр ( җитәкчеләре – “Батыр” спорт мәктәбе тренеры Альбина Вәлиуллина) һәм Иске Суыксудан Илгиз Рәхмәтуллин (җитәкчесе – Мансур Җамалетдинов) 77 килограммга кадәр авырлык үлчәүләрендә җиңүгә ирештеләр.

10.05.2015 14:33

Буада 10 май иртәсендә бер-бер артлы ике янгын чыкты

Янгын частена шәһәрнең Бебель урамында сарай яну турында беренче хәбәр төнге 3 сәгать 59 минутта килеп иреште. Санаулы минутлар эчендә бәла булган урынга килеп җиткән янгын сүндерүчеләр утны тиз йөгәнләделәр, аның таралуына юл куймадылар. Янгын нәтиҗәсендә сарайга һәм мунча түбәсенә зыян килде. Икенче янгын 7 сәгать 26 минутта Газ урамында чыкты. Монда шулай ук мунча белән сарай түбәсе янды. Ут мунчадан чыккан.

10.05.2015 10:04

Буада 9 Май бәйрәме грандиоз салют белән тәмамланды

Бөек Җиңүнең 70 еллыгы кичендә буалылар шәһәрнең В. Трусенев исемендәге үзәк стадионында җыелдылар. Аларны муниципаль район башлыгы Азат Айзетуллов котлады. Район үзешчәннәре шунда сәхнә корып концерт күрсәтте. Һәм бәйрәмгә искиткеч матур төсмер өстәп кичке ун тулганда стадион өстендә салют залплары яңгырады.

10.05.2015 09:00

Буада Ефремов һәм К. Маркс урамнары киселешендә ике җәяүлене бәрдерделәр

Өч көн элек кенә Карлы авылы урамындагы авариядә 35 яшьлек ир-ат һәлак булды. 9 май кичендә исә 1980 елгы әни һәм аның 5 яшьлек улы унынчы модельле “Жигули” көпчәге астына эләктеләр. Каза күрүчеләрне тиз арада дәваханәгә озаттылар. Шөкер, алар исән. Әни кешенең баш сөяге-ми җәрәхәте алуы билгеле. Бу хәл 22 сәгать 6 минутта Ефремов урамындагы “Авалон” кибете каршында булды. Бу урында җәяүле аркылы чыгу урыны юк. Автомобиль йөртүчеләр дә, җәяүлеләр дә, юлларда игътибарлы булсыннар иде. Бигрәк тә тәүлекнең караңгы вакытында. Читать дальше...